काठमाडौंजेष्ठ २४, २०८३। नेपाल र भारतबीच डिजिटल भुक्तानी प्रणालीलाई थप प्रभावकारी बनाउने उद्देश्यसहित परराष्ट्रमन्त्रीस्तरीय बैठकमा महत्वपूर्ण सहमति भएको छ। भारत भ्रमणमा रहेका नेपालका परराष्ट्रमन्त्री शिशिर खनाल र भारतीय विदेशमन्त्री एस. जयशंकर बीच नयाँदिल्लीमा भएको प्रतिनिधिमण्डलस्तरीय वार्तामा सीमापार क्यूआर भुक्तानी सेवासहित विभिन्न विषयमा समझदारी भएको हो।
दुवै देशले नेपाल क्लियरिङ हाउस लिमिटेड (एनसीएचएल) र भारतीय राष्ट्रिय भुक्तानी निगम (एनपीसीआई) बीच भएको पूर्वसमझदारीलाई थप प्रभावकारी रूपमा कार्यान्वयन गर्ने सहमति गरेका छन्। यसले नेपाल र भारतबीचको डिजिटल वित्तीय कारोबारलाई अझ सहज, सुरक्षित र द्रुत बनाउने अपेक्षा गरिएको छ।
नेपाल–भारत सीमापार क्यूआर भुक्तानी प्रणाली सुरु भएपछि नेपाल आउने भारतीय पर्यटक, विद्यार्थी तथा उपचारका लागि आउने सेवाग्राहीहरूले मोबाइलमार्फत सजिलै भुक्तानी गर्न पाएका छन्। नयाँ सहमतिसँगै दुई देशबीचको आर्थिक, व्यापारिक तथा पर्यटन सम्बन्ध अझ मजबुत हुने विश्वास गरिएको छ।
विशेषज्ञहरूका अनुसार यस कदमले डिजिटल अर्थतन्त्रको विस्तार, नगदरहित कारोबारको प्रवर्द्धन तथा दुई देशबीचको वित्तीय सहकार्यलाई नयाँ उचाइमा पुर्याउनेछ।
