🗳️ प्रत्यक्षतर्फको उम्मेदवारी आजदेखि-⏳ निर्वाचन आउन ४४ दिन बाँकी…

रियल खबर अनलाइन | ६ माघ, काठमाडौं – प्रतिनिधिसभा निर्वाचन अन्तर्गत प्रत्यक्ष निर्वाचन प्रणाली (FPTP) तर्फका उम्मेदवारहरूको मनोनयन दर्ता प्रक्रिया आजदेखि सुरु हुने भएको छ।

निर्वाचन आयोगका अनुसार देशभरका १६५ निर्वाचन क्षेत्रहरूमा आज बिहान १० बजेदेखि मनोनयन दर्ता खुला गरिएको हो। सम्बन्धित निर्वाचन क्षेत्रका निर्वाचन अधिकृतको कार्यालयमा उम्मेदवार वा तिनका प्रतिनिधिमार्फत मनोनयन दर्ता गर्न सकिने व्यवस्था गरिएको छ।

निर्वाचन आउन अब ४४ दिन मात्र बाँकी रहेको अवस्थामा मनोनयन दर्तासँगै चुनावी गतिविधि थप तीव्र बन्ने देखिएको छ। आयोगले उम्मेदवार, राजनीतिक दल तथा सरोकारवाला सबै पक्षलाई निर्वाचन आचारसंहिता, २०८२ को पूर्ण पालना गर्न आग्रह गरेको छ।

आयोगले निर्वाचनलाई स्वच्छ, निष्पक्ष, स्वतन्त्र र भयमुक्त वातावरणमा सम्पन्न गर्न सबैको सहकार्य आवश्यक रहेको उल्लेख गर्दै जिम्मेवार भूमिका निर्वाह गर्न आह्वान गरेको छ।