रियल खबर अनलाईनफागुन १५, काठमाडौं। देश यतिबेला चुनावी माहोलले तातेको छ । चोक–गल्लीदेखि सभाहलसम्म राजनीतिक बहस र चुनावी अभियानले माहोल तताइरहेका बेला राष्ट्रिय खेलकुदको ठूलो प्रतियोगिता भने अपेक्षाकृत सुनसान देखिएको छ। राजधानीको मुटु त्रिपुरेश्वरस्थित **दशरथ रंगशाला**मा जारी राष्ट्रिय फुटबल लिग दर्शक अभावका कारण ओझेलमा परेको हो।
बुधबार र बिहीबार बिहान १० बजेदेखि सुरु गरिएका खेलहरूमा दर्शकको उपस्थिति अत्यन्त न्यून देखियो। बिहानको समयमा खेल सञ्चालन गरिनु र चुनावी गतिविधि तीव्र रहनुले पनि दर्शक सहभागिता घटेको अनुमान गरिएको छ। मैदानमा खेलाडीको जोश देखिए पनि दर्शकदीर्घा भने प्रायः खालीजस्तै देखिन्थ्यो।
बुधबार भएको लालिगुराँस एसोसिएसन र कांक्रेविहारबीचको प्रतिस्पर्धामा साधारण प्यारापिटमा दर्शक नै नभएको दृश्यले लिगको अवस्थालाई प्रष्ट पारेको थियो। प्रतिस्पर्धात्मक खेलमा लालिगुराँस एसोसिएसनले कांक्रेविहारलाई ४–१ गोल अन्तरले पराजित गर्दै प्रभावशाली जित हात पार्यो। मैदानभित्र रोमाञ्चक खेल चलिरहँदा बाहिर भने चहलपहल न्यून रह्यो।
राष्ट्रिय स्तरको प्रतियोगितामा दर्शकको यस्तो न्यून उपस्थितिले आयोजक, खेलप्रेमी र सम्बन्धित निकायलाई गम्भीर बनाएको छ। चुनावी व्यस्तता सकिएपछि लिगमा दर्शकको चासो बढ्ने अपेक्षा गरिएको छ।
खेलकुद र राजनीति दुवै राष्ट्रिय महत्वका विषय भए पनि, खेलमैदानको उत्साह जोगाउन सरोकारवाला निकायले समय व्यवस्थापन र प्रचार–प्रसारमा विशेष ध्यान दिनुपर्ने देखिन्छ।
