रियल खबर अनलाईन काठमाडौं। फिलिपिन्सको दक्षिणी क्षेत्रमा गएको शक्तिशाली ७.८ म्याग्निच्युडको भूकम्पका कारण ठूलो जनधनको क्षति भएको छ। प्रारम्भिक विवरणअनुसार कम्तीमा ३० भन्दा बढी व्यक्तिको मृत्यु भएको छ भने सयौं घाइते भएका छन्। भूकम्पका कारण दर्जनौं भवन, व्यापारिक संरचना तथा सार्वजनिक पूर्वाधारमा व्यापक क्षति पुगेको बताइएको छ।
भूकम्पपछि विभिन्न स्थानमा पहिरो गएको, भवनहरू भत्किएको तथा तटीय क्षेत्रमा सानो सुनामीको प्रभाव समेत देखिएको अन्तर्राष्ट्रिय सञ्चारमाध्यमहरूले जनाएका छन्। उद्धार टोलीहरू प्रभावित क्षेत्रमा परिचालन गरिएका छन् भने घाइतेहरूको उपचार र बेपत्ता व्यक्तिहरूको खोजी कार्य तीव्र पारिएको छ।
विशेषगरी मिन्डानाओ क्षेत्र र जनरल सान्तोस सहर सबैभन्दा बढी प्रभावित भएको बताइएको छ। भूकम्पका शक्तिशाली धक्काले सर्वसाधारणमा त्रास फैलिएको छ भने हजारौं नागरिक सुरक्षित स्थानतर्फ सारिएका छन्।
फिलिपिन्स सरकार तथा आपतकालीन निकायहरूले प्रभावित क्षेत्रहरूमा राहत तथा उद्धार कार्यलाई प्राथमिकता दिएका छन्। क्षतिको पूर्ण विवरण आउन बाँकी रहेकाले मृतक तथा घाइतेको संख्या अझै बढ्न सक्ने अनुमान गरिएको छ।
विश्वका विभिन्न राष्ट्र तथा अन्तर्राष्ट्रिय संस्थाहरूले फिलिपिन्सप्रति सहानुभूति व्यक्त गर्दै आवश्यक सहयोगका लागि प्रतिबद्धता जनाएका छन्।
