रियल खबर अनलाईन २८ मंसिर । कर्णाली प्रदेशमा आयोजित प्रदेशस्तरीय सन्देश सभालाई सम्बोधन गर्दै नेपाली कम्युनिस्ट पार्टीका शीर्ष नेताहरूले जनतासँग सार्वजनिक रूपमा माफी मागेका छन्। उनीहरूले विगतका कमजोरी स्वीकार गर्दै अब नयाँ ढंगले अघि बढ्ने प्रतिबद्धता व्यक्त गरेका छन्।
नेकपाका संयोजक पुष्पकमल दाहाल ‘प्रचण्ड’ले गत भदौ २३ र २४ गते भएको जेनजी विद्रोहपछि आफूहरू पूरै परिवर्तन भएको दाबी गरे। उनले जेनजी आन्दोलनलाई केवल असन्तुष्टि मात्र नभई राजनीतिक चेतनाको ठूलो संकेतको रूपमा लिँदै कम्युनिस्ट आन्दोलनलाई आत्मसमीक्षा गर्न बाध्य बनाएको बताए।
प्रचण्डका अनुसार जेनजी विद्रोहकै कारण नेकपा माओवादी केन्द्र, एकीकृत समाजवादीसहित १० कम्युनिस्ट घटकहरूबीच एकताको नयाँ आधार सिर्जना भएको हो। “हामीले जनताको आवाज नसुन्दा के हुन्छ भन्ने सन्देश जेनजीले दिएको छ,” उनले भने।
सभामा नेताहरूले अब जनताको भावना, युवाको अपेक्षा र परिवर्तनको चाहनालाई केन्द्रमा राखेर राजनीति गर्ने प्रतिबद्धता जनाएका छन्।
🔥 कर्णालीबाट आएको यो सन्देशलाई कम्युनिस्ट राजनीतिमा नयाँ मोडको संकेतका रूपमा हेरिएको छ।
