रियल खबर अनलाईन | २४ पुस, काठमाडौं — वैदेशिक रोजगारीको सपना देखाइ श्रमिकबाट करिब १८ करोड रुपैयाँ उठाएर कन्सल्टेन्सी सञ्चालक फरार भएका छन्। सामाजिक सञ्जाल फेसबुकमा प्रचार गरिएको आकर्षक पोस्टर देखेर आवेदन दिने तयारी गरेका श्रमिकहरू ठगीमा परेका हुन्।
काठमाडौंको कोटेश्वरस्थित ‘कोज्मो एजुकेसन कन्सल्टेन्सी’ ले विदेश पठाइदिने, अध्ययन तथा रोजगारीको सुनिश्चितता दिने आश्वासन दिँदै ठूलो रकम उठाएको र त्यसपछि सम्पर्कविहीन बनेको पीडितहरूले बताएका छन्। ठगीमा परेका धेरै श्रमिकहरूले आफूले जम्मा गरेको रकम फिर्ता नपाएको भन्दै उजुरी दिएका छन्।
पीडितहरूका अनुसार कन्सल्टेन्सीले सामाजिक सञ्जालमार्फत विश्वसनीय देखिने प्रचार सामग्री, नक्कली कागजात र छिटो प्रक्रिया हुने झुटा आश्वासन प्रयोग गरी विश्वास जितेको थियो। रकम उठाइसकेपछि कार्यालय बन्द गरिएको र सञ्चालकहरू फरार अवस्थामा रहेको जनाइएको छ।
घटनापछि सम्बन्धित निकायमा उजुरी परेपछि प्रहरीले अनुसन्धान सुरु गरेको छ भने कन्सल्टेन्सीका सञ्चालकहरूको खोजी तीव्र बनाइएको छ। यस घटनाले सामाजिक सञ्जालमार्फत हुने वैदेशिक रोजगारी तथा अध्ययन सम्बन्धी विज्ञापनप्रति गम्भीर प्रश्न उठाएको छ।
➡️ प्रहरीले सर्वसाधारणलाई सामाजिक सञ्जालका भ्रामक विज्ञापनप्रति सजग रहन र आधिकारिक अनुमति प्राप्त संस्थामार्फत मात्र प्रक्रिया अघि बढाउन आग्रह गरेको छ।
